ايوا صحيح نسيت اني رجعت امبارح متأخر بليل على ١٢ كدا اصلا

وانشغلت ب حاجات في البيت ونمت ٢ ونص على نفسي

ف صحيت على الفجر

لقيتك بعتي

مش عارف جبت منين اني ترددت ابعتلك دي 😅😂 تهيؤات بعيد عنك

المهم تحت اهو

عارفه يا شاهندا ؟ بالنسبالي لو هتكلميني عني انا

وعن اختياراتي واي الي افضله بالنسبه ل الي بحبه والي عايزه والي مبحبوش.

بالنسبالي انا

انا فعلا مش حابب تجاره

مش حابب تجاره لأسباب مختلفه

١/ المواد بتاعتها والعربي الي فيها مثلا بس هو اه حاليا هيبقى نص نص ولكن ، انا قافل نفسي عن موادها ولكن ممكن اذاكرها عادي جدا

٢/ بعيدا عن المجتمع الي فيها والتنظيم ، هو يقرفك اصلا انك تدخل تحضر فيها ولو ربع محاضره

بس عمتا هو انا مش هعاشرهم ولو عاوز احضر هحضر ومن البيت للكليه ومن الكليه للبيت

٣/بأقلم نفسي معاها على عكس ما اكون فعلا بذاكرها وحاضرها بحب ومش محتاج اني أءقلم نفسي عليها

بس استبعدي تماما فكره ان ملهاش مستقبل

مفيش فعلا كليه ملهاش مستقبل

دا الي بيقول كدا دا ريح واستريح ومعملش حاجه وقضى سنينه لعب ولما جه يدخل سوق العمل فاضي معهوش حاجه

ملقاش حاجه

ف بدل ما يعاتب نفسه ويرمي اللوم على نفسه

علقها على الكليه الي هو فيها

ومن هنا طلع مصطلح كليه ملهاش لازمه ظهر..

مفيش كليه ملهاش لازمه

بس اه فيه كليه فيها فُرصها محددوه وفُرصها عايزه معافره وسعي تقيل وتوفيق من عند ربنا

عشان ربنا يكرمك ف بوزيشن تقيل في مجال كُليتك

لانها مُشبعه شويه

نيجي لزراعه

عن نفسي بجد اه حابب اه ان يتقالي بعد كدا دكتور

بعيدا عن انه اللقب اه هو مش حاجه يعني اصلا ماديا بس معنوياً اه حابب جدا انه يتقالي دكتور ، زي الي نفسه يتقاله بشمهندس زي الي نفسه يتقاله اي لقب تاني بيعرف عنه وعن هو مين....

انا بحب المواد العلميه جدا وبالاخص البايو مثلا بعيدا عن درجات ثانوي العار

بس اقدر اقعد ساعات عليها وانا متمزج ومستمتع اكتر من منا هقعد في ماده من مواد تجاره

فيها اقسام عملي

جميله وحلوه، احسن بكتير لان اصلا

فيها شغل فعلا وجو الكليه كويس واهو الواحد يعيش ويبني ذكريات حلوه جميله وايام متتنسيش ويتحاكى بيها بعدين

احب ابقى فيها والله

وجو التيمات ونعمل شغل ومشاريع عملي وحاجات نخلصها ونبدع زي اي تيمات متقسمه بسمعها في دفعات بيعملوا شغل ويوروه للدكتور وكدا

وهتحرك وهروح واجي واتعامل اكتر شويه بدل قاعده البيت دي

بس بعيدا عن كل دا،، نيجي للكافه الي راجحه عندي ومخلياني مقدرش امشي في الطريق دا .

انا حالي مختلف شويه

وفي الحقيقه انا عليا مسئوليات والتزامات كتيره

ومسئول على اكتر من حد وعندي ناس في رقبتي

وهحكيلك تفاصيل كدا، مبحبش اذكرها والله ولا احكيها

بس عشان انتِ اقرب حد ليا ف هقولك

انا والدي موظف عادي على قد الحال

المرتبات الي تليق بموظف عادي جدا واقل من العادي كمان

ميعديش الي ٩ الاف...

لانه ماشي على قوانين قديمه ، الي اصغر منه ب ٢٠ سنه او ٢٥ سنه ومتخرج بياخد ١٢ الف

هو دكتور في شركه الشرب والمياه ،، كيميائي يعتبر وكان في علوم واتخرج منها ودخلها

والدي يا شاهندا عنده ٥٧ سنه حالياً، واه كبير فعلا

وكمان ٣ سنين هيطلع معاش

مرتبه دا هيبقى معاش بعد كدا وهيقل كتير، بعيدا عن المكافآت نهايه الخدمه الي بردو مبالغ عاديه و

بس هتطلع وقت المعاش وانا عارف الي هيحصل فيها وهتروح فين وهتُستخدم مش بطريقه فيها ترتيب اولويات

واستخدام خاطئ وهيتصرف منها كتير وهيحطها في شهادات وحوارات هبقى احكيلك سببها بعدين ... هو كويس وطيب بس عنده تفكير خاطئ وغير واعي ب الي احنا فيه وبيعند وعِندي ،ودي اكتر صفه وحشه عنده بحاول ابعدها عشان متبقاش عندي

والدي مكنش مستغل للفرص وبيروح من فرصه للتانيه متنقل وخلاص وكان بيتنقل كتير وبيسيب

حاجات في ايده قَيمه، عشان راحته خالص والي بيحبه

وفي الاخر لا شاف راحه ولا حتى شاف الي بيحبه

المهم يعني

في الاخر المرتب دا الي هو ٩ الاف، بيروح ١ الف منه وشويه للاسف جدا ،سجاير

و ٤ الاف بيروحوا تسديد اقساط شهادات ،للاسف غلط بس مهما تقنع مفيش فايده، وحتى محدش بيشوف منها حاجه من عيلتي ،شهادات مركونه وقيمتها الي مفهاش بردو اصلا حاجه بتضيع بسبب التضخم ،

بيتصفصف على ٣ الف وشويه للشهر كله ،

شئ مضحك ومهزله حرفياً!! قوليلي دول يعملوا اي ؟

ولولا ان جدي امي هي الي بتراعيه زي ما كانت بتراعي جدتي الله يرحمها ، وكراكيب كدا في بيت العيله

ومعاها المعاش بتاعه بردو الي هو ٧ الاف وبيتصرف عليه وعلى علاجاته وفي البيت كهربا ومياه وغاز وبيت العيله كله الي هو عند جدي وعندي خلان ،ربنا يرحمنا منهم ،انعدام تام للمسئوليه وحق مكتسب وعقوق، ربنا يهدي ويبعدنا عن آذاهم،

ف امي هي الي ممشيه يعتبر كل حاجه في البيت دا ودا وبتستلف من هنا ومن هنا وديون،

والانسان له طاقه وتعبت ،وانا شايف تعبها من بدري.

انا مبحبش اتكلم عن حد كدا بالاخص لو قريب او من عيلتي

حتى لو في اي من العبر او اني ابينه وحش

بس هي دي الحقيقه، والحقيقه مش عيب، وانتِ مش غريبه، ومسيرك في يوم كنت هحكيلك كل دا واكتر

ولان محدش والده كامل ١٠٠ في الميه

ومحدش والده كويس دايما، ولان محدش بياخد كل حاجه

بس اهو احسن من غيره في حاجات ووحش في حاجات

وزي ما انتي عارفه محدش كامل ،والحمدلله دا القدر

وهو السيد الوالد مش بخيل ولكن في أساسيات كتيره واقعه، وهو مش شايفها،

ف الحال مش الطف حاجه وانا دلوقتي الي موجود الكبير

وعندي ٢ اخوات صغيرين واحد في ٦ ابتدائي وواحد في رابعه واختي اهي في ٢ ثانوي باكالرويا،، ومصاريف ودروس ووالدي مش بيعمل حاجه للاسف، مش عارف يعمل حاجه، والغلاء بيزيد والمصاريف بتزيد

ف خلاصهً لكل دا ، هما كلهم على مسئوليتي انا وعلى رقبتي وانا الي ربنا مقدرني واعطاني اني اساعدهم وادفع هنا وهنا واسدد ودوروس ومصاريف بيت واظبط

الكافه دي ,,ومراعاه ودوشه تانيه، وادوار تانيه كتير

ف مش هشوفهم بيتبهدلوا وبالاخص امي، وانا قاعد ماسك في دراستي وبس

وانا الي بدفع مصاريفي ودنيتي وحاجتي

ف انا مش هحملهم فوق طاقتهم لانه للاسف محدش هيعرف يوفرها ليا

،دا بجانب ، اني بركن جزء بردو كويس ومهم تجهيزاً لنفسي عشان أجيلك...

منا مش هقعد ٤ سنين مش بحوش حاجه، واجيلك بعدها وانا ٣٠ سنه مثلا!!.

ومعلش بردو خلينا في الواقع،، مامتك وعيلتك هيهمهم مصلحتك.، انا اضمنلهم اي ، لما يلاقوني فاضي مش عامل حاجه لسه؟ ، حتى لو لسه هعمل؟ ايوا مين الي يضمن،؟؟ بالنسبالهم في فرص تانيه احسن،، ,

وانا برضو اي الي يضمنلي فرصه قدام ؟

فكره ان محمد والدته تشدني لبرا عن طريق حد على كلام محمد ؟

محدش ضامن حاجه

محدش عارف الي هيحصل

كلها مخاطرات وهضحي ب حاجات اهم، مينفعش اضحي بيها،خالص،

عشان حاجه ممكن فعلا بردو تكون حلوه ليا بعدين

بس اي الانانيه دي ؟

حتى ولو انا مثلا هقول مثلا الي طلعت منه خلال الشهر ونص دول من وقت ما بدأت في الشغل دا

اسيبه لمصاريفي في الاربع سنين الجايه

تبع الكليه ، مع ان الله اعلم ممكن احتاج عليهم حبه بسيطه زياده، ولكن بردو معلش نفس سؤال!

اي الانانيه دي ؟

ليه اعمل كدا اصلا ؟ هضر غيري اكتر من ما هنفع نفسي

وانا بالنسبالي فرحه اي حد بسببي

بالنسبالي بالدنيا كلها ،ف ما بالك القريبين ؟

محمد للاسف ميعرفش

مع انه المفروض عارف الي ورايا والي عليا ويعتبر حكيتله بس مش كل حاجه ومش بالتفصيل دا زي ما حكيتلك

بس محمد متعاكس مع نقطه انه عايز مصلحتي بعدين

وانه عاوزني بردو معاه عشان اونسه ونونس بعض وكدا زي ما بدأنا مع بعض من اعدادي لحد ما خلصنا ثانوي

وساحبني هو امبارح ومغفلني افتكرت عايزني في حاجه مهمه، لكن طلع عشان دا

ومفيش فايده، في الشرح ، بعد ساعتين سبته مع نفسه ومع مصطفى ومشيت

بالنسبه لكُليتي تجاره

غصب عني هذاكرها وهحبها وهمشي فيها وهركز في التقديرات جدا حتى وهي اصلا مش اهم حاجه

بس عشان اكون عملت الي عليا من ناحيه الكليه

ووفيت فيها عشان لو هحتاجتها تسند جمب كورساتها

والحاجات الي هاخدها ليها وانا مخططها سواء شهادات MBA او حوالي تمن شهادات تاني ليهم علاقه ب تجاره

،، عشان اكون مسكت هنا وهنا وعملت الي عليا

لو على زراعه انا حتى والله قولت

ماشي انا ممكن حتى اروح فيها يومين بس بالكتير ومش فارقه الشغل في اليومين دول

لان الكليه انا عقبال ما اروح البيت هتبقى الساعه ٦ وشويه بليل ف اكتر من نص يومي اتاكل

دا غير اني هذاكر

ودا حوار تاني عاوز وقت ..

لكن انا لما بصيت يا شاهندا على الجدول

على كلام نور لمحمد وان فيه ٧ سكاشن بس في الاسبوع والباقي محاضرات ، والسكاشن اهم ، بردو اعترضت

لكن اتصدمت لما بصيت في الجدول ولقيت ان في ٣٥ سكشن يا شاهندا في الاسبوع

٣٥ سكشن يا شاهندا متخيله !! دي علوم دي حرفيا

لا وكمان طلعت ٦ ايام في الاسبوع مش ٥

لكي ان تتخيلي ؟؟

دا الي انا شوفته من الجدول

و٦ محاضرات بس فقط

وكل بيبدأ من وقت ما شغلي بيبدأ والي هو ٩ او ١٠ الصبح وافضل لحد ما ارجع

ما الاقيش حاجه اشتغلها

دا حتى مش هيبقى عندي حاجه اشتغلها بليل، لان هقعد اذاكر كتير

دا غير ان الشغل مواعيده متغيره

وبشوف حاجه تانيه مع دا

عارف ان الكلام كتير جدا

بس حبيت احكيلك ، وادي اللغبطه الي عندي كلها.

فاهماني عمتا بعد كل اللفه دي ؟ ويمكن بردو اكون غلط

يعني انت رأيك اي ؟

مش عارف وصلك المنظور كله ولا لا

بس قوليلي عشان بس عشان انه بيتقالي فرصه مهمه

وهتضيع فرصه متتعوضش ،ودا من محمد ومن خالتي والي ميعرفوش حاجه عمتا من التفاصيل دي

بس ف اعمل اي ؟